ದಿನಗಳುರುಳಿದವು. ಅದೊಂದು ದಿನ ತಣ್ಣಗೆ ಬೀಸುತ್ತಿತ್ತು ಗಾಳಿ. ಆಗಸದಿಂದ ಎಂದಿನಂತೆ ಸಣ್ಣ ಸಣ್ಣ ಹನಿಗಳು ಸಾಗರವನ್ನು ಸೇರಲೋ ಎಂಬಂತೆ ಪಟಪಟನೆ ಪೈಪೋಟಿ ನಡೆಸುತ್ತಾ ಬೀಳುತ್ತಿದ್ದವು. ಆತನೋ ಎಂದಿನಂತೆ ಧ್ರುವ ತಾರೆಯ ನಿರೀಕ್ಷೆಯಲಿ ಆಗಸವನೇ ದಿಟ್ಟಿಸುತ್ತಿದ್ದ. ಇದ್ದಕ್ಕಿದ್ದಂತೆ ಕಾರ್ಮೋಡವು ಇನ್ನಷ್ಟು ಕಪ್ಪಿಟ್ಟಿತು. ಸುತ್ತಲೂ ಕತ್ತಲಾವರಿಸಿತು. ನೋಡನೋಡುತ್ತಿದ್ದಂತೆ ತಣ್ಣನೆ ಬೀಸುತ್ತಿದ್ದ ಗಾಳಿ ರೌದ್ರಾವತಾರ ತಾಳಿತು. ಹನಿಗಳ ಪೈಪೋಟಿಯು ಎಲ್ಲೆ ಮೀರತೊಡಗಿತು. ಸಾಗರವನ್ನು ಸೇರುವ ತವಕ ತೀವ್ರವಾಗಿ ಮಧ್ಯೆಯಿರುವ ನೌಕೆಯನ್ನು ನುಂಗಲೇನೋ ಎಂಬಂತೆ ಸುರಿಯತೊಡಗಿತು ಜಡಿಮಳೆ. ನೌಕೆಯಂತೂ ಪ್ರಕೃತಿಯ ಈ ಅನಿರೀಕ್ಷಿತ ನಡೆಯಿಂದ ತತ್ತರಿಸತೊಡಗಿತು. ಸಾಗರದ ನೀರಿನ ಮಟ್ಟ ಮೇಲೇರುತ್ತಿದ್ದಂತೆ ತೋರಿತು. ನೀರಿನ ಏರಿಳಿತಗಳ ಸದ್ದು ಎಷ್ಟೋ ದಿನದಿಂದ ಹಸಿದು ಬಳಲಿದ ಮೃಗವೊಂದರ ಉಸಿರಿನ ಸದ್ದಿನಂತೆ ಭಾಸವಾಗತೊಡಗಿತು. ಜಡಿಮಳೆ; ಸುಂಟರಗಾಳಿ; ಕತ್ತಲೆ; ಅಲ್ಲೊಮ್ಮೆ ಇಲ್ಲೊಮ್ಮೆ ಆಗಸವನೇ ತುಂಡರಿಸುವಂತೆ ಕಂಡುಮರೆಯಾಗುವ ಕೋಲ್ಮಿಂಚು; ಸಾಗರದ ರೌದ್ರ ನರ್ತನ; ಗಿವಿಗಡಚಿಕ್ಕುವ ಗುಡುಗು; ಬೆಚ್ಚಿಬೀಳಿಸುವ ಸಿಡಿಲು... #ಧ್ರುವತಾರೆ-೨ #ಸಣ್ಣಕಥೆ #ಹಾಗೆ_ಸುಮ್ಮನೆ #ಅರೆಘಳಿಗೆ_ಹೊಳೆದ_ಸಾಲುಗಳು #yqjogi #yqkannada #ಕನ್ನಡ_ಪ್ರೀತಿ