سلام لکھتا ہے شاعر تمہارے حسن کے نام بکھر گیا جو ک | Urdu شاعری اور غزل

سلام لکھتا ہے شاعر تمہارے حسن کے نام بکھر گیا جو کبھی رنگِ پیرہن سرِ بام نکھر گئی ہے کبھی صبح دوپہر کبھی شام کہیں جو قامتِ زیبا پہ سج گئی ہے قبا چمن میں سرو و صنوبر سنور گئے ہیں تمام بنی بساطِ غزل جب ڈبو لیے دل نے تمہارے سایۂ رخسار و لب میں ساغر و جام سلام لکھتا ہے شاعر تمہارے حسن کے نام تمہارے ہاتھ پہ ہے تابشِ حنا جب تک جہاں میں باقی ہے دلدارئ عروسِ سخن تمہارا حسن جواں ہے تو مہرباں ہے فلک تمہارا دم ہے تو دم ساز ہے ہوائے وطن اگرچہ تنگ ہیں اوقات سخت ہیں آلام تمہاری یاد سے شیریں ہے تلخئ ایام سلام لکھتا ہے شاعر تمہارے حسن کے نام (یہ نظم قیدخانے کے مکین فیض کی طرف سے اپنی اہلیہ الیس فیض کے لیے سالگرہ کا تحفہ تھی۔ ایلس کو خاص تاکید کی گئی تھی کہ اس نظم کے ناشر کی طرف سے انہیں جو بھی رقم دی جائے وہ اسے خود پر خرچ کریں) ©PK تمہارے حسن کے نام فیض احمد فیض #نظم